Arolwg Gwylio Adar yr Ardd 2022: Y canlyniadau

Mae adar y to ar y brig am y 19eg flwyddyn yn olynol. Ond mae'n hanfodol ein bod yn parhau i gadw golwg ar adar y to gan fod llawer llai o gwmpas bellach. Mae'r boblogaeth wedi gostwng cymaint fel eu bod ar Restr Goch Adar y DU ar gyfer adar – byddai unrhyw ostyngiad pellach yn ddinistriol.

Cynhaliwyd yr Arolwg Gwylio Adar cyntaf yn 1979 ac felly mae gennym bellach dros 40 mlynedd o ddata i'n helpu i ddeall sefyllfa adar yr ardd yn y DU. Mae'r tabl isod yn dangos y tueddiadau hirdymor ar gyfer rhai o'n hadar mwyaf cyfarwydd.

Eisiau gwybod mwy am sut mae poblogaethau adar yn newid yn y DU? Mae'r adroddiad Cyflwr Natur yn archwiliad iechyd ar sefyllfa bywyd gwyllt y DU. Fe’i lluniwyd drwy ddefnyddio data bywyd gwyllt gan grŵp o 50 o sefydliadau cadwraeth. Cyhoeddwyd yr adroddiad diweddaraf yn 2019 a chanfuwyd bod 15% o'r 8,431 o rywogaethau a aseswyd bellach mewn perygl o ddiflannu. Gallwch weld sut mae adar ac anifeiliaid eraill yn ffynnu ledled y DU, yn ogystal ag edrych ar y pwysau sy'n wynebu bywyd gwyllt a'r ymdrechion sy'n cael eu gwneud i achub natur.

Mae'r DU wedi colli dros 38 miliwn o adar yn ystod y 50 mlynedd diwethaf ac yn sgil newid yn yr hinsawdd, gwyddom y bydd pethau'n gwaethygu. Dyna pam rydym wedi lansio apêl frys i helpu i brynu 75,000 hectar ychwanegol o dir ar gyfer natur yn ystod y 10 mlynedd nesaf. Tir fel mawnogydd, sy'n gynefin i’r gylfinir a’r cwtiad aur, a morfeydd heli, sydd o fudd i adar hirgoes gwych fel y cambig. Gallwch helpu drwy roi rhodd heddiw.